سیاسیات- اسلامی جمہوریہ ایران کے وزیر خارجہ سید عباس عراقچی نے اپنے بیان میں کہا ہے کہ میں اصولی طور پر، میڈیا کے ذریعے مذاکرات کے اہم نکات کے بارے میں گفتگو کرنے سے گریز کرتا ہوں، لیکن میں جو کہنا چاہتا ہوں وہ یہ ہے کہ جھوٹ کو دہرانے سے بنیادی حقائق تبدیل نہیں ہوتے۔ سرکاری میڈیا کے مطابق سید عباس عراقچی نے مزید کہا کہ ایران کو این پی ٹی کے بانی دستخط کنندگان میں سے ایک کے طور پر، مکمل نیوکلیئر فیول سائیکل حاصل کرنے کا پورا حق حاصل ہے۔ ان کا کہنا تھا کہ این پی ٹی کے کئی ارکان ہیں جو یورینیم کو افزودہ کرتے ہیں جبکہ جوہری ہتھیاروں کو مکمل طور پر مسترد کرتے ہیں۔ انہوں نے کہا کہ اس کلب میں ایران کے علاوہ کئی ایشیائی، یورپی اور جنوبی امریکی ممالک بھی شامل ہیں۔ ایرانی وزیر خارجہ کا کہنا تھا کہ اپنی بات زیادہ سے زیادہ دہرانے اور اشتعال انگیز بیان بازی سے مذاکرات میں کامیابی کے امکانات کو تباہ کرنے کے سوا کچھ حاصل نہیں ہوگا۔ انہوں نے یہ بھی کہا کہ ایک قابل اعتماد اور پائیدار معاہدہ ممکن ہے، لیکن فیصلہ کن سیاسی ارادے اور منصفانہ رویے کی ضرورت باقی ہے۔
