سیاسیات۔ پاکستان کرکٹ بورڈ (پی سی بی) نے قومی کرکٹ ٹیم کے ہیڈ کوچ کے لیے اشتہار دے دیا۔
پی سی بی کی جانب سے اپنی ویب سائٹ پر ہیڈ کوچ کا اشتہار جاری کیا گیا ہے۔
خیال رہے کہ پی سی بی نے عاقب جاوید کو چیمپئنز ٹرافی تک عبوری ہیڈ کوچ مقرر کیا تھا، پھر دورہ نیوزی لینڈ کے لیے انہیں مزید ذمہ داریاں دی گئیں۔
ذرائع کا کہنا ہےکہ عاقب جاوید اب ہیڈکوچ کے لیے دلچسپی نہیں رکھتے، عاقب جاوید ڈائریکٹر ہائی پرفارمنس کے لیے دلچسپی رکھتے ہیں۔
پی سی بی نے ڈائریکٹر ہائی پرفارمنس کے لیے بھی اشتہار جاری کیا ہے۔ ندیم خان کے مستعفی ہونے کے بعد سے ڈائریکٹر ہائی پرفارمنس کا عہدہ خالی تھا۔
ذرائع کے مطابق پی سی بی ایک بار پھر غیر ملکی ہیڈ کوچ کی طرف جاسکتا ہے۔
ہیڈ کوچ کے لیے لیول تھری کرکٹ کوچ کی اہلیت درکار ہے، 4 مئی تک ہیڈ کوچ کے لیے درخواستیں طلب کی گئی ہیں۔
ذرائع کا کہنا ہےکہ ہیڈ کوچ کے لیے پاکستان کرکٹ بورڈ کے پاس محدود چوائس ہیں اور غیر ملکی کوچ کی طرف پی سی بی کا رحجان زیادہ ہے۔
ذرائع کا یہ بھی کہنا ہےکہ پی سی بی کوچ کے لیے بڑے ناموں کی طرف نہیں جائےگا۔
