سیاسیات- لیجنڈری مصنف، طنز و مزاح نگار اور میزبان انور مقصود نے ٹی20 ورلڈکپ میں امریکہ کے ہاتھوں پاکستان کی عبرتناک شکست کی انوکھی وجہ بتا دی۔
ڈیلاس کے گرینڈ پریری اسٹیڈیم میں کھیلے گئے ٹورنامنٹ کے گیارہویں میچ میں امریکہ نے پاکستان کو شکست دیکر بڑا اپ سیٹ کردیا، اس شکست کے بعد جہاں شائقین کرکٹ غصے سے آگ بگولہ ہیں تو وہیں قومی ٹیم پر مزاحیہ میمز بھی بن رہی ہیں جبکہ شوبز شخصیات بھی پاکستان کی شکست پر دلچسپ ردعمل دیتے نظر آرہے ہیں۔
سوشل میڈیا پر انور مقصود کی ویڈیو وائرل ہورہی ہے جس میں اُن سے پوچھا گیا کہ ٹی ٹوئنٹی ورلڈ کپ میں امریکہ سے میچ ہارنے پر وہ کیا کہیں گے؟
اس سوال کے جواب میں انور مقصود نے کہا کہ پاکستان مجبوری میں امریکہ سے میچ ہارا ہے کیونکہ ہمیں آئی ایم ایف سے قرضہ ملنا ہے جو ابھی تک نہیں ملا۔
انور مقصود نے کہا کہ آئی ایم ایف نے پاکستان کے سامنے شرط رکھی ہوگی کہ امریکہ سے میچ ہارو، اسی صورت میں قرضہ ملے گا، اس کے علاوہ تو مجھے شکست کی کوئی دوسری وجہ نظر نہیں آتی۔
اُنہوں نے مزید کہا کہ جنہوں نے پاک بھارت میچ کے ٹکٹ خریدے ہوئے ہیں وہ اب آدھی قیمت میں وہی ٹکٹ فروخت کریں گے کہ لے لو بھائی۔
