سیاسیات- پاکستان کے نائب وزیراعظم اور وزیر خارجہ اسحاق ڈار نے انکشاف کیا ہے کہ بحرین نے اپنی نیشنل گارڈ کے لیے پاکستان سے 1800 سے زائد فوجی اور سیکیورٹی اہلکار بھرتی کیے ہیں، جن میں پاکستانی فوج کے 30 ریٹائرڈ افسران بھی شامل ہیں۔
ترک خبر رساں ادارے انادولو ایجنسی کے مطابق اسحاق ڈار نے یہ بات اسلام آباد میں پاکستان اور بحرین کے مشترکہ وزارتی کمیشن کے تیسرے اجلاس کے دوران کہی۔
اجلاس کی مشترکہ صدارت پاکستان کے وزیر خارجہ اسحاق ڈار اور بحرین کے وزیر خارجہ عبداللطیف بن راشد الزیانی نے کی۔
اس موقع پر اسحاق ڈار نے بحرینی حکومت کا شکریہ ادا کرتے ہوئے کہا کہ پاکستان بحرین نیشنل گارڈ میں 1800 سے زائد پاکستانی اہلکاروں، جن میں 30 ریٹائرڈ فوجی افسران بھی شامل ہیں، کی بھرتی کو قدر کی نگاہ سے دیکھتا ہے۔
پاکستانی وزیر خارجہ کے اس بیان سے دونوں ممالک کے درمیان دفاعی اور سیکیورٹی شعبوں میں جاری تعاون کی اہمیت بھی سامنے آئی ہے۔
تاہم رپورٹ میں ان اہلکاروں کی تعیناتی کے مقامات، ذمہ داریوں اور بھرتی کی مدت کے بارے میں مزید تفصیلات فراہم نہیں کی گئیں۔
تازہ ترین خبروں اور تبصروں کیلئے ہمارا واٹس ایپ چینل فالو کیجئے۔
