سیاسیات-کوئٹہ میں نویں محرم کا جلوس امام بارگاہ ناصر العزاء سے برآمد ہو کر اپنے مقررہ راستوں پر رواں دواں ہے، اس موقع پر صوبائی دارالحکومت میں سکیورٹی ہائی الرٹ اور موبائل فون سروس معطل کردی گئی۔
ڈی آئی جی کوئٹہ کے مطابق شہر میں ڈھائی ہزار سے زائد فورسز اور پولیس کے جوان حفاظتی اقدامات کے تحت تعینات کردیے گئے ہیں۔ نویں محرم الحرام کا جلوس آج دوپہر ڈیڑھ بجے امام بارگاہ ناصر العزاء سے برآمد ہوا۔
شہر کے داخلی و خارجی راستوں کی کڑی نگرانی جاری ہے جب کہ پرنس روڈ سمیت طوغی روڈ اور میکانگی روڈ پر دکانیں سیل کر دی گئی ہیں۔ علاوہ ازیں نویں محرم الحرام کے حوالے سے شہر میں موبائل نیٹ ورکس سروس بھی بند ہو گئی۔ صوبائی حکومت کے اعلامیے کے مطابق موبائل فون سروس رات 8 بجے تک بند رہے گی ۔
