قابض بھارتی فورسز نے مقبوضہ کشمیر میں مزید 3 نوجوانوں کو شہید کر دیا

سیاسیات- قابض بھارتی فورسز نے مقبوضہ کشمیر میں مزید 3 نوجوانوں کو شہید کردیا۔ کشمیر میڈیا سروس کے مطابق بھارتی فوج نے ایک بار پھر ریاستی دہشتگردی کا مظاہرہ کرتے ہوئے نام نہاد آپریشن کی آڑ میں 3 نہتے کشمیری نوجوانوں کو شہید کیا۔ بارہمولا میں سرچ آپریشن کے دوران تینوں نوجوانوں کو فائرنگ کرکے شہید کیا گیا، اوڑی سمیت بارہمولا کے مختلف علاقوں کی ناکہ بندی کرکے موبائل اور انٹرنیٹ سروس بند کردی گئی، قابض بھارتی فوجیوں نے متعدد نوجوانوں کو وحشیانہ تشدد کا نشانہ بھی بنایا۔ مقبوضہ کشمیر میں پلوامہ، کولگام، راجوڑی سمیت دیگر علاقوں میں بھی بھارتی فوج کا نام نہاد سرچ آپریشن جاری رہا، لوگوں کو وحشیانہ تشدد کا نشانہ بنایا گیا اور چادر اور چار دیواری کا تقدس پامال کیا، لوگوں کو ضرورت کے تحت بھی گھروں سے نکلنے کی اجازت نہ دی گئی۔