سیاسیات-قطر میں جاری فٹبال ورلڈ کپ کے پری کوارٹر فائنل میچ میں مراکش نے سنسنی خیز مقابلے کے بعد پینالٹی ککس پر سابق عالمی چیمپئن اسپین کو شکست دے دی۔ پرتگال بھی سوئٹرزلینڈ کو ایک کے مقابلے میں چھ گول سے شکست دے کر کوارٹر فائنل میں پہنچ گیا
مراکش اور اسپین کے درمیان کھیلے جانے والے پہلے میچ میں مقررہ وقت تک دونوں ٹیمیں کوئی گول نہ کرسکیں۔جس کے بعد اضافی وقت دیا گیا دونوں ٹیمیں اضافی وقت میں بھی گول نہ کرسکیں اور میچ پھربرابر ہوگیا۔
جس کے بعد میچ کا فیصلہ پینالٹی ککس پر کرایا گیا۔
فیصلے کے لیے دونوں ٹیموں کو پانچ، پانچ پینالٹی ککس دی گئیں، مراکش کی ٹیم چار پینالٹی ککس میں سے تین پر گول کرنے میں کامیاب رہی جبکہ اسپین کی ٹیم ابتدائی تینوں پینالٹی ککس پر گول کرنے میں ناکام رہی ۔
کل کے دوسرے پری کوارٹر فائنل میچ میں پرتگال نے سوئٹرزلینڈ کو ایک کے مقابلے میں چھ گول سے شکست دے دی۔
فٹبال ورلڈکپ میں پرتگال نے سوئٹزرلینڈ کو ٹینس اسکور سے شکست دے دی، ایک کے مقابلے میں چھ گول سے آؤٹ کلاس کرتے ہوئے کوارٹر فائنل میں جگہ بنالی۔
میچ میں رونالڈو کی جگہ فرسٹ الیون کا حصہ بننے والے گونکیلو ریموس رواں ورلڈ کپ کی پہلی ہیٹ ٹرک بنانے میں کامیاب ہوئے ،فاتح ٹیم کے دیگر گول پیپے ، رفائیل گیریرو اور لیاؤ نے اسکور کیے۔
لوسیل کے اسٹیڈیم میں کھیلے گئے میچ میں اسٹار کھلاڑی کرسٹیانو رونالڈو پرتگال کی فرسٹ الیون کا حصہ نہ بنے، 14 برس اور 31 میچوں کے بعد یہ پہلا موقع تھا کہ رونالڈو اپنے ملک کی جانب سے میچ میں اُترنے والی پہلی پلیئنگ الیون میں شامل نہ تھے ،اُن کی جگہ گونکیلو ریموس کو کھلایا گیا جنہوں نے لیجنڈ کھلاڑی کی کمی محسوس نہیں ہونے دی اور تین گول کرکے جاری ورلڈ کپ میں پہلی ہیٹ ٹرک کرنے والے کھلاڑی بن گئے۔
پرتگال نے پہلے ہاف میں ہی چار گول کرکے میچ کو یکطرفہ کردیا تھا،کھیل کے دوسرے ہاف میں پرتگال کی ٹیم مزید دو گول کرنے میں کامیاب ہوئی جبکہ سوئٹزرلینڈ کا واحد گول آکانجی نے کیا۔
کھیل ختم ہونے سے 20 منٹ قبل رونالڈو بھی متبادل کھلاڑی کے طور پر میدان میں آئے ، اُنہوں نے گیند حریف ٹیم کے جال میں پہنچائی مگر اُن کو آف سائیڈ قرار دیا گیا، میچ کا اختتام پرتگال کی چھ ایک کی جیت پر ہوا۔
کوارٹرفائنل میں پرتگال کا مقابلہ مراکش سے ہوگا۔
