ترتیب و تنظیم: اے واحدی
"زیادہ سے زیادہ دباؤ” کی امریکی پالیسی کے بالکل برعکس، ایرانی تیل کی برآمدات بائیڈن انتظامیہ کے دوران 37 فیصد بڑھ کر 2 ملین بیرل یومیہ تک پہنچ گئیں۔ یہ تعداد نہ صرف ٹرمپ کے جے سی پی او اے سے دستبردار ہونے کے بعد سے سب سے زیادہ ہے بلکہ مسلسل چار امریکی صدور کی طرف سے وضع کردہ پابندیوں کے غیر موثر ہونے کو بھی ظاہر کرتی ہے۔ نئی رپورٹس بتاتی ہیں کہ ایران نے غیر روایتی مالیاتی میکانزم کے ایک پیچیدہ نیٹ ورک کے ذریعے پابندیوں کو ناکام بنا کر امریکی خارجہ پالیسی میں پابندیوں کے معماروں کو ایک منفرد چیلنج سے دوچار کر دیا ہے۔
پابندیوں کی تاریخ؛ کارٹر سے بائیڈن تک
جمی کارٹر نے تہران میں امریکی سفارت خانے پر قبضہ کرنے کے بعد نومبر 1979ء میں تیل کی پہلی پابندی کا نفاذ کیا۔ اس نے 700,000 بیرل ایرانی تیل (امریکی کھپت کا 4%) کی درآمد پر پابندی لگا دی اور اپنے ہم وطنوں سے توانائی بچانے کی اپیل کی۔ اوباما (2012-2015ء) نے ایران کے مرکزی بینک پر پابندی لگا کر اور SWIFT کے ساتھ رابطہ منقطع کرکے، ایران کی تیل کی برآمدات میں 56% (2.5 ملین سے 1.1 ملین بیرل) کی کمی کی۔ ٹرمپ (2018-2020) نے "زیادہ سے زیادہ دباؤ ” کی پالیسی اپنا کر ایران کی برآمدات کو 300,000 بیرل (85% کمی) تک کم کر دیا۔
600 نئی پابندیوں کے باوجود، بائیڈن کے دور میں ایران کی برآمدات 20 لاکھ بیرل تک پہنچ گئیں اور ٹرمپ کے دوسرے دور حکومت میں ملک کی تیل کی فروخت کا ریکارڈ ٹوٹ گیا، ان کی انتظامیہ کے حکام کے مسلسل دعووں کے باوجود کہ تیل کی برآمدات کو صفر کر دیا جائے گا۔ ایران نے ریکارڈ توڑ تیل بیچا۔ بائیڈن کے امریکی وزیر خارجہ، انتھونی بلنکن نے سینیٹ کی ایک سماعت میں اعتراف کیا کہ "تہران نے پابندیوں کو بے اثر کرنے کے لیے ہر ممکن کوشش کی اور کامیاب رہا۔”
ایران کے خلاف پابندیوں کی ناکامی کو خلیج فارس کے خطے میں پیچیدہ تجارتی نیٹ ورک بنانے اور اسے وسعت دینے میں ایران کی مہارت کے نتیجے میں دیکھا جا سکتا ہے۔ غیر رسمی چینلز، ثالثی کمپنیوں اور متبادل مالیاتی میکانزم کا استعمال کرتے ہوئے، ایران پابندیوں کی وجہ سے پیدا ہونے والے اقتصادی دباؤ کے ایک اہم حصے کو روکنے میں کامیاب رہا ہے۔ ایران پر امریکی پابندیوں کے معمار رچرڈ نیفیو کہتے ہیں "ہم نے بینکوں سے کہا یا تو ایران کے ساتھ کاروبار کریں یا امریکہ کے ساتھ، دیں۔” "انہوں نے امریکہ کا انتخاب کیا۔۔۔۔ لیکن اب ایران کو نئے خریدار مل گئے ہیں، جو ہمارے قوانین کو نظر انداز کرنے کو تیار ہیں۔”
ایران پر امریکی تیل کی پابندیاں، جنہیں کبھی "انسانی تہذیب کی تاریخ کی سخت ترین پابندیاں” کہا جاتا تھا، اب امریکی مالیاتی تسلط کے زوال کی علامت بن چکی ہیں۔ جیسا کہ انٹونی بلنکن نے اعتراف کیا ہے کہ ایران نے نہ صرف پابندیوں کو ناکام بنایا ہے بلکہ تیل کی فروخت میں 80 بلین ڈالر کے ساتھ اپنے علاقائی اثر و رسوخ کو مضبوط کرنے کے لیے ضروری فنڈز بھی فراہم کیے ہیں۔
تازہ ترین خبروں اور تبصروں کیلئے ہمارا واٹس ایپ چینل فالو کیجئے۔
