سیاسیات- گورنر ہاؤس میں گورنر پنجاب سردار سلیم حیدر خان سے سعودی عرب کے سفیر نواف بن سعید المالکی نے ملاقات کی۔ ملاقات کے دوران پاک سعودی تعلقات اور سعودی سرمایہ کاری کو فروغ دینے پر تبادلہ خیال کیا گیا۔ اس موقع پر گورنر سردار سلیم حیدر خان کا کہنا تھا کہ پاکستانی حکومت اور عوام کا سعودی عرب سے محبت اور عقیدت کا رشتہ ہے جبکہ سعودی عرب نے ہر مشکل وقت میں پاکستان کی مدد کی ہے ۔اور سعودی عرب کا بین الاقوامی فورمز پر پاکستان کی مسلسل حمایت کا شکریہ ادا کرتے ہیں۔
گورنر پنجاب کا کہنا تھا کہ سعودی سرمایہ کاروں کو پاکستان میں سرمایہ کاری کی دعوت دیتے ہیں ،جبکہ صدر مملکت آصف علی زرداری اور موجودہ حکومت بیرونی سرمایہ کاری کو بڑھانے میں پرعزم ہے۔ انکا کہنا تھا کہ پاکستان میں بیرونی سرمایہ کاروں کیلئےسازگار ماحول موجود ہے۔ گورنر پنجاب نے مزید کہا کہ خصوصی سرمایہ کاری سہولت کونسل غیرملکی سرمایہ کاروں کو ون ونڈو پلیٹ فارم کے تحت سہولیات فراہم کرر رہی ہے۔ ان کا کہنا تھا کہ مسلم اُمہ کو فلسطینی عوام پر اسرائیلی فوج کی بربریت اور جارحیت کیخلاف بین الاقوامی فورمز پر آواز اٹھانی چاہیئے۔ سعودی عرب کے سفیر نواف بن سعید المالکی کا کہنا تھا کہ پاکستان انکا دوسرا گھر ہے جبکہ سعودی عرب کی تعمیرو ترقی میں پاکستانی افرادی قوت کا کردار قابل تعریف ہے۔
