سیاسیات- گلگت بلتستان کی سیاست میں ڈرامائی تبدیلیاں سامنے آ رہی ہیں، پی ٹی آئی کے سابق صوبائی وزیر حاجی گلبر خان کو وزیر اعظم شہباز شریف نے وزیر اعلیٰ کا امیدوار نامزد کر دیا جس پر پیپلز پارٹی نے انتخابی عمل سے لاتعلق رہنے کا اعلان کر دیا۔ دیامر سے تعلق رکھنے والے حاجی گلبر خان تحریک انصاف کی حکومت میں صوبائی وزیر رہ چکے ہیں۔ وزیر اعلیٰ خالد خورشید کی نااہلی کے بعد حاجی گلبر نے فارورڈ بلاک قائم کرنے کا اعلان کرتے ہوئے وزارت اعلیٰ کیلئے کاغذات نامزدگی جمع کرائے تھے۔ دوسری طرف پہ پیپلز پارٹی کے صوبائی صدر امجد حسین ایڈووکیٹ بھی وزارت اعلیٰ کے امیدوار تھے تاہم وزیر اعظم کی جانب سے حاجی گلبر خان کو امیدوار نامزد کرنے کے بعد امجد کے خواب بکھر چکے ہیں۔
