سیاسیات- تہران میں مختلف ممالک کے حکومتی عہدیدار اور شخصیات کی رہبر معظم سے ملاقات کا سلسلہ جاری ہے۔
عالمی تنظیموں کے سربراہان اور مختلف ممالک کے نمائندے شہید صدر رئیسی کی تشییع جنازہ میں شرکت کے لیے تہران پہنچے ہیں۔
اس موقع پر پاکستانی وزیراعظم شہباز شریف نے رہبر معظم انقلاب اسلامی آیت اللہ العظمی خامنہ ای سے ملاقات کی اور پاکستان کے عوام کی جانب سے ان کو اور ایرانی حکومت اور عوام کو تعزیت پیش کی۔
رہبر معظم نے پاکستانی وزیراعظم سے ملاقات کے دوران کہا کہ شہید صدر رئیسی کے دورہ اسلام آباد سے دونوں ملکوں کے درمیان تعلقات کا نیا باب آغاز ہوسکتا ہے۔ قائم مقام صدر محمد مخبر ان معاملات کو آگے بڑھائیں گے۔
رہبر معظم نے پاکستانی حکومت اور عوام کی ہمدردی کا شکریہ ادا کرتے ہوئے کہا کہ ایران پاکستان کے ساتھ تعلقات کو خصوصی اہمیت دیتا ہے اور ایک برادر ملک کی نگاہ سے دیکھتا ہے۔ گذشتہ سالوں کے دوران دونوں کے تعلقات میں نشیب و فراز آئے ہیں۔ موجودہ پاکستانی حکومت اس حوالے سے اہم اقدامات کرسکتی ہے۔
انہوں نے کہا کہ دوست ممالک کے تعلقات میں اتار چڑھاؤ آتا رہتا ہے لہذا ان مراحل کو سنجیدگی کے ساتھ طے کرنے کی ضرورت ہے۔
اس موقع پر پاکستانی وزیراعظم شہباز شریف نے کہا کہ شہید صدر رئیسی کا دورہ پاکستان مفید تھا۔
انہوں نے دونوں ممالک کے درمیان مختلف شعبوں میں تعلقات بڑھانے کا عزم ظاہر کیا۔
پاکستانی وزیراعظم نے ایران کے نگران صدر ڈاکٹر محمد مخبر کے لئے نیک خواہشات کا اظہار کیا۔نائب وزیراعظم اور وزیر خارجہ محمد اسحاق ڈار، وفاقی وزیر داخلہ سید محسن نقوی، وفاقی وزیر تجارت جام کمال خان، وفاقی وزیر اطلاعات و نشریات عطاء اللہ تارڑ اور وزیر اعظم کے معاون خصوصی طارق فاطمی بھی وزیراعظم کے ہمراہ تھے۔
