سیاسیات- کالعدم سپاہ صحابہ کے زیراہتمام نئے نام ’’سنی علما کونسل‘‘ لاہور کے نام سے دھرمپورہ سے لاہور پریس کلب تک دفاع عثمان ؓ احتجاجی ریلی نکالی گئی۔ سربراہ سپاہ صحابہ مولانا احمد لدھیانوی نے کہا کہ صحابہ ہمیں اپنی جان سے زیادہ پیارے ہیں، حضرت عثمان غنیؓ کی شان میں گستاخی کرنے والے بدبخت یاسین قادری کو اب تک گرفتار نہیں کیا گیا، جو افسوسناک، تشویشناک اور سکیورٹی اداروں کی کارکرد گی پر سوالیہ نشان ہے۔
صوبائی صدر مولوی طاہر اشرف اور صوبائی ترجمان مولوی حافظ حسین احمد نے خطاب کرتے ہوئے کہا کہ سیدنا عثمان غنی ؓ کی شان میں گستاخی کرنے والے مجرموں کو نہ پکڑا گیا اور نہ اسے سزا دی گئی ہے۔ انہوں نے کہا کہ ملزم کو گرفتار نہ کیا گیا تو ہم سخت ترین ردعمل دینے پر مجبور ہونگے۔ انہوں نے کہا کہ ہم اینٹ کا جواب پتھر سے دینا جانتے ہیں، اگر اداروں نے ہمارا جائز مطالبہ نہ مانا تو جو سخت ردعمل آئے گا جو حالات پیدا ہونگے، اس کی ذمہ داری حکومت پر ہوگی۔ اس موقع پر مخالف فرقہ کیخلاف شدید نعرے بازی بھی کی گئی۔
