سیاسیات- حکومت نے سوشل میڈیا کو ’’اپنے طریقے‘‘ سے کنٹرول کرنے کیلئے انٹرنیٹ کمپنیز میں فائروال (فلٹر) لگانے کی تمام تیاری کرلی ہے، جس کی بدولت سماجی روابط کی ویب سائٹس مثلاً فیس بک، یوٹیوب اور ایکس پر ’قابلِ اعتراض مواد‘ روکنے کیلئے استعمال کیا جائیگا۔ پاکستان میں فائر وال کوئی نئی چیز نہیں۔ سرکاری ادارے فائر وال ویب سائٹس اور سوشل ایپس کو بلاک کرنے کیلئے بروئے کار لاتے رہے ہیں، اب فائر وال کے استعمال کا دائرہ وسیع کیا جا رہا ہے۔ پی ٹی اے نے 2013 میں کینیڈین کمپنی نیٹ سویپر کے فائر والز یعنی فلٹرز نصب کروائے تھے۔ تازہ ترین ٹیکنالوجیز کی مدد سے تیار کیے جانیوالے فائر والز کی مدد سے سوشل میڈیا کے مواد کی مانیٹرنگ آسان اور موثر ہو جائے گی۔
فائر والز کی مدد سے حکومت معلوم کرسکے گی کہ قابلِ اعتراض مواد کہاں سے آ رہا ہے۔ اس کے نتیجے میں سوشل میڈیا اکاؤنٹس کو بلاک کرنا آسان ہو جائے گا۔ ساتھ ہی ساتھ رسائی بھی مشکل اور محدود بنا دی جائے گی۔ اس سلسلے میں اس اکاؤنٹ کی مثال دی جا سکتی ہے، جس سے مسلح افواج پر کیچڑ اچھالا جا رہا تھا۔ یہ اکاؤنٹ میجر(ر) عادل راجہ چلا رہے تھے، عادل راجہ سابق فوجیوں کی طرف سے مسلح افواج کو نشانہ بنا رہے تھے۔ ایک سرکاری عہدیدار نے بتایا کہ سوشل میڈیا کے بڑے پلیٹ فارمز پہلے قابلِ اعتراض مواد سے متعلق ہماری شکایات نہیں سنتے تھے، مگر اب وہ شکایت کیے جانے پر متوجہ ہوتے ہیں۔
