سیاسیات-پاکستان اور جاپان نے شمسی توانائی اور صاف پانی کے منصوبوں میں مل کر کام کرنے پر اتفاق کرلیا۔
وزیرخارجہ بلاول بھٹو زرداری نے ٹوکیو میں جاپان کے وزیراعظم سے ملاقات کی جس میں مسلسل رابطوں اور مختلف شعبوں میں تعاون بڑھانے پر گفتگو کی گئی۔
بلاول بھٹو زرداری نے جاپانی ہم منصب سے بھی ملاقات کی۔
ملاقات کے بعد مشترکہ پریس کانفرنس میں بلاول کا کہنا تھاکہ جاپان کے ساتھ تعلقات کا فروغ، سرمایہ کاری، تجارت، سیاحت اور مختلف شعبوں میں تعاون بڑھانا چاہتے ہیں۔
انہوں نے کہا کہ پاکستان جاپان کو افرادی قوت مہیا کرسکتاہے، دورے میں نجی شعبے کے افراد سے بات چیت کروں گا کیونکہ نجی شعبہ دوطرفہ تعلقات میں کلیدی کردار ادا کرسکتا ہے۔
وزیرخارجہ نےجاپانی ہم منصب کو دورہ پاکستان کی دعوت بھی دی اور کہا کہ اپنے جاپانی ہم منصب کو پاکستان کے دورے کی دعوت دیتا ہوں۔
بلاول کا کہنا تھاکہ پاکستانی عوام جاپان کیلئے اچھے جذبات رکھتے ہیں، سیلاب متاثرین کی مدد پر جاپانی حکومت کے مشکور ہیں، اسکلڈ فورس کے تبادلے کیلئے پاکستان میں لنگیویج ایسسمنٹ ٹیسٹ کی سہولت پر اتفاق ہوا ہے۔
انہوں نے کہا کہ سولرائیزیشن ، ڈی سیلی نیشن اور واٹرپیوریفکیشن کے شعبے میں مل کر کام کرنے پر اتفاق کیاہے۔
خیال رہے کہ وزیر خارجہ بلاول بھٹو زرداری 3 روزہ سرکاری دورے پر جاپان کے دارالحکومت ٹوکیو میں ہیں۔
