سیاسیات- وزیر دفاع خواجہ آصف کا کہنا ہے کہ آپریشن گولڈ اسمتھ کے ریکروٹ بانی ٹی آئی عمران خان کی نجات کے لیے مہم چلا رہے ہیں۔
خواجہ آصف نے نومنتخب امریکی صدر ڈونلڈ ٹرمپ کے نامزد ایلچی رچرڈ گرینل کے بیان پر ردعمل دیتے ہوئے کہا کہ بانی پی ٹی آئی کے لیے مغرب سے آواز اٹھانے والوں پر واضح ہونا چاہیے کہ پاکستانی قوم اپنے مفادات کا تحفظ کرنا جانتی ہے، ہماری اول و آخر ترجیح صرف اور صرف پاکستان ہے۔
انہوں نے کہا کہ عمران خان کی رہائی کا مطالبہ کرنے والے عناصر کو اسرائیل کی بھرپور حمایت حاصل ہے، اس سے صاف ظاہر ہوتا ہےکہ بانی پی ٹی آئی اسرائیلی اثاثہ ہے، بانی پی ٹی آئی کے ذریعے وہ واحد مسلمان ایٹمی قوت کو خدا نخواستہ سر نِگوں کرنا چاہتے ہیں۔
دوسری جانب ن لیگ کے سینیٹر طلال چوہدری نے کہا کہ بانی پی ٹی آئی کی رہائی کے لیے حکومت ٹرمپ انتظامیہ کے بیانات سے کوئی دباؤ محسوس نہیں کر رہی، جب یہ لوگ حکومتی نمائندے کے طور پر بات کریں گے تو پاکستانی حکومت بھی جواب دے گی۔
ان کا کہنا تھا کہ یہ کیسی بات ہے پہلے امریکہ بانی پی ٹی آئی کو آزادی دلوائے گا اور پھر بانی پی ٹی آئی قوم کو امریکہ سے آزاد کروائیں گے۔
پروگرام میں گفتگو کرتے ہوئے امریکہ میں پاکستان کے سابق سفیر حسین حقانی نے کہا کہ بانی پی ٹی آئی کی رہائی کا مطالبہ کرنےوالے رچرڈگرینل نے ابھی تک اپنا منصب نہیں سنبھالا، جب وہ عہدہ سنبھالیں گے تو انہیں اپنی پوری انتظامیہ سے بات کرنا پڑےگی۔
حسین حقانی نے کہا کہ اس وقت انہیں بتایا جائےگاکہ ماضی میں بانی پی ٹی آئی اوراُن کے حامی امریکہ کے خلاف بیانات دیتے رہے ہیں، وہ امریکہ کے کسی مفاد کے نہیں ہیں۔
