سیاسیات- لبنان کی اسلامی مزاحمتی تنظیم حزب اللّٰہ کے شہید سربراہ سید حسن نصراللّٰہ اور سید ہاشم صفی الدین کی نماز جنازہ ادا کر دی گئی۔ سید حسن نصراللّٰہ کو بیروت ایئرپورٹ روڈ کے قریب آہوں اور سسکیوں کے ساتھ سپرد خاک کر دیا گیا، ان کا جسد خاکی تدفین کیلئے اسٹیڈیم سے لے جایا گیا، جہاں لاکھوں کی تعداد میں سوگواران موجود تھے۔ خبر ایجنسی کے مطابق سید ہاشم صفی الدین کو آج جنوبی لبنان میں سپرد خاک کیا جائے گا۔
سید حسن نصراللّٰہ اور سید ہاشم صفی الدین کے تاریخی تشیع جنازے میں شرکت کیلئے لبنان اور دنیا بھر سے لاکھوں افراد بیروت پہنچے تھے۔ بیروت میں امن و امان قائم رکھنے کے لیے فوج اور داخلی سیکیورٹی فورسز کے یونٹس تعینات کیے گئے تھے۔ واضح رہے کہ سید حسن نصراللّٰہ 27 ستمبر 2024ء کو اسرائیل کے جنوبی بیروت پر فضائی حملے میں شہید ہوئے تھے، جس میں اسرائیلی جیٹ طیاروں نے 85 ٹن دھماکہ خیز مواد سے ضاحیہ میں 6 رہائشی عمارتیں تباہ کر دی تھیں، جبکہ سید ہاشم صفی الدین 3 اکتوبر 2024ء کو اسرائیلی حملے میں شہید ہوئے۔
