سیاسیات- میڈیا رپورٹس کے مطابق اس وقت غزہ کے لئے امداد اپنی کم ترین سطح پر ہے۔ اسرائیل کو انتباہ کے باوجود غزہ کی صورتحال نازک ہے اور خطے میں شہریوں کو خوراک کی شدید قلت کا سامنا ہے۔ رپورٹس سے پتہ چلتا ہے کہ صیہونی حکومت، اشیائے خورد و نوش کے ذخائر اور ان کی حفاظت پر مامور فلسطینیوں پر حملے کرکے امدادی سامان کو تباہ کر رہی ہے جس کی وجہ سے غزہ میں خوراک کا بحران شدید ہو رہا ہے۔ وہاں موجود صحافیوں کا کہنا ہے کہ چھوٹے چھوٹے بچے بھوک سے تڑپ رہے ہیں۔ ہمارے پاس بھی کچھ نہیں بچا ہے، دنیا والو نیند سے اٹھو اور غزہ کے مظلوم عوام کی مدد کے لئے آگے آو۔
رپورٹ میں مزید کہا گیا ہے کہ وسطی اور جنوبی غزہ، جہاں اب زیادہ تر شہری مقیم ہیں، شدید بھوک اور قحط کا شکار ہے چنانچہ نومبر میں کھانے کی قطار میں دم گھٹنے سے 3 افراد شہید ہو گئے۔ برطانوی اخبار نے اپنی رپورٹ میں بتایا ہے کہ غزہ میں آٹے کی شدید قلت کے باعث ایک بوری آٹے کی قیمت 162 ڈالر تک پہنچ گئی ہے۔
