سیاسیات۔ امریکی محکمہ خارجہ کے مطابق جنوبی اور وسطی ایشیائی امور کے بیورو کے سینیئر بیورو آفیشل (ایس بی او) ایرک میئر آٹھ اپریل کو تین روزہ دورے پر اسلام آباد آ رہے ہیں۔
محکمہ خارجہ کی جانب سے ہفتے کو جاری بیان کے مطابق جنوبی اور وسطی ایشیائی امور کے بیورو کے سینیئر افسر ایرک میئر آٹھ سے 10 اپریل تک اسلام آباد میں ہوں گے۔
بیان کے مطابق اس دورے کا مقصد پاکستان منرلز انویسٹمنٹ فورم میں اہم معدنیات کے شعبے میں امریکی مفادات کو فروغ دینا ہے۔
امریکی محکمہ خارجہ نے اپنے بیان میں مزید کہا ہے کہ ایرک میئر کی قیادت میں اسلام آباد کا دورہ کرنے والا وفد پاکستان میں امریکی کاروباری اداروں کے لیے مواقع بڑھانے اور دونوں ممالک کے درمیان اقتصادی تعلقات کو گہرا کرنے کو فروغ دینے کے لیے سینیئر پاکستانی حکام سے ملاقات کریں گے۔
اس کے علاوہ محکمہ خارجہ کا کہنا ہے کہ ’ایس بی او میئر انسداد دہشت گردی پر ہمارے مسلسل تعاون کی اہمیت کو اجاگر کرنے کے لیے سینیئر عہدیداروں کے ساتھ بھی بات چیت کریں گے۔‘
پاکستان منرلز انویسٹمنٹ فورم 2025 آٹھ اور نو اپریل کو اسلام آباد کے جناح کنوینشن سینٹر میں ہونے جا رہا ہے۔
