سیاسیات- اسرائیلی فوج نے کہا ہے کہ اتوار کو ایک ٹرک ڈرائیور نے مقبوضہ مغربی کنارے اور اردن کے درمیان اسرائیلی سرحدی چوکی پر فائرنگ کی جس سے تین اسرائیلی محافظ جان سے گئے۔ سکیورٹی فورسز نے حملہ آور کو مار دیا۔
خبر رساں ایجنسی اے ایف پی کے مطابق یہ فائرنگ الینبی پل کی سرحدی گزر گاہ پر ہوئی جسے شاہ حسین پل بھی کہا جاتا ہے۔ یہاں پر اسرائیل کے زیر انتظام کارگو ایریا ہے جہاں اردن سے آئے ٹرک مقبوضہ مغربی کنارے میں جانے ہونے والا مال اتارتے ہیں۔
یہ واقعہ مقبوضہ مغربی کنارے میں بڑھتے ہوئے تشدد کے دوران پیش آیا جہاں بڑے اسرائیلی فوجی حملے جاری ہیں۔
فوج کا کہنا تھا کہ حملہ آور ٹرک ڈرائیور اردن سے کراسنگ کے علاقے میں پہنچا۔
فوجی بیان کے مطابق ڈرائیور ٹرک سے باہر آیا اور پل پر موجود اسرائیلی سکیورٹی فورسز پر فائرنگ کردی۔
’اس حملے کے نتیجے میں تین اسرائیلی شہری جان سے گئے۔‘
فوج نے بعد میں وضاحت کی کہ یہ افراد فوج یا پولیس فورس کا حصہ نہیں تھے بلکہ سکیورٹی گارڈ کے طور پر کام کر رہے تھے۔
