سیاسیات۔ نومنتخب امریکی صدر ڈونلڈ ٹرمپ کا کہنا ہے کہ غزہ جنگ بندی ہماری تاریخی کامیابی کا نتیجہ ہے، یہ مشرق وسطیٰ میں امن کے لیے پہلا قدم ہے۔
ڈونلڈ ٹرمپ نے اپنے دوسرے دورہ صدارت کی تقریب حلف برداری سے قبل واشنگٹن میں حامیوں سے خطاب کرتے ہوئے کہا کہ ہم سرحد سے دراندازی کو روکیں گے، افتتاحی خطاب میں سرحدی حفاظتی اقدامات کا خاکہ پیش کریں گے۔
ٹرمپ نے کہا کہ غزہ جنگ بندی ہماری تاریخی کامیابی کا نتیجہ ہے، یہ مشرق وسطیٰ میں امن کے لیے پہلا قدم ہے۔
ٹرمپ نے یہ بھی کہاکہ فوج کوآئرن ڈوم میزائل ڈیفنس شیلڈ تعمیرکر نے کا حکم دیں گے،فوج میں موجود کمزوریوں کا ختم کریں گے۔
ٹرمپ نے سابق امریکی صدر جان ایف کینیڈی کے قتل کیس کا ریکارڈجاری کرنے کا بھی وعدہ کرتے ہوئے کہا کہ رابرٹ ایف کینیڈی اور مارٹن لوتھرکنگ جونیئر قتل سے متعلق ریکارڈ جاری کریں گے جبکہ عوامی دلچسپی کےحامل دیگر دستاویزات بھی جاری کیے جائیں گے۔
انہوں نے کہا کہ وہ مردوں کو خواتین کے اسپورٹس سے باہر کریں گے، یہ کام کل ہی کریں گے، ٹرانس جینڈر کھلاڑیوں کو خواتین کے کھیلوں میں حصہ لینے سے روکیں گے۔تاریخی رفتار اور طاقت کےساتھ کام کریں گے۔امریکہ کو درپیش ہربحران کو حل کریں گے۔بائیڈن کے تمام ایگزیکٹو آرڈرز کو منسوخ کیا جائے گا۔
اس کے علاوہ انہوں نے کہا کہ ٹک ٹاک کو بچانے کی ضرورت ہے۔ امریکہ کوٹک ٹاک کی نصف ملکیت حاصل کرنی چاہیے۔ٹک ٹاک کی مارکیٹ کیپٹلائزیشن کھربوں ڈالرتک پہنچ سکتی ہے۔ بڑے AI پلانٹس کی اجازت کے لیے ایمر جنسی اختیارات استعمال کریں گے۔
دوسری جانب ایلون مسک بھی اسٹیج پر موجود تھے، انہوں نے شرکاء سے مختصر خطاب کرتے ہوئے کہا کہ یہ کامیابی درحقیقت شروعات ہے، آگے بڑھنا اہم ہے کیونکہ اہم تبدیلیاں کرنی ہیں، ان تبدیلیوں کو مضبوط کرنا ہے تا کہ امریکہ کے لیے صدیوں تک مضبوط رہنے کی بنیاد ڈالیں۔
واضح رہےکہ نو منتخب امر یکی صدر ڈونلڈ ٹرمپ کی حلف برداری آج شام ہوگی۔
واشنگٹن ڈی سی میں شدید سردی کے باعث حلف برداری کی تقریب ان ڈور منتقل کی گئی ہے۔ واشنگٹن میں پیر کو درجہ حرارت منفی 11 تک گر سکتا ہے۔
40 سال بعد امریکہ کے منتخب صدر کی تقریب ان ڈور منعقد کی جائے گی۔
ٹرمپ کی تقریب حلف برداری میں جاپان، بھارت، آسٹریلیا کے وزرا خارجہ شرکت کریں گے، چین کے نائب صدر اپنے ملک کی نمائندگی کریں گے جبکہ پاکستان کی نمائندگی امریکہ میں پاکستان کے سفیر رضوان سعید شیخ کریں گے۔
اس کے علاوہ بلاول بھٹو سمیت پاکستان کی کئی سیاسی شخصیات اور پاکستانی امریکن بھی تقریب میں شریک ہوں گے۔
