سیاسیات- نو منتخب امریکی صدر ڈونلڈ ٹرمپ نے روسی صدر پیوٹن سے گفتگو کی خواہش کا اظہار کردیا۔
ٹرمپ کا کہنا تھا کہ صدارتی الیکشن جیتنے کے بعد 70 سے زائد عالمی رہنماؤں سے بات ہوئی لیکن ابھی تک روسی صدر سے بات نہیں ہوئی، ان سے بات کرنے کا ارادہ ہے۔
بعد ازاں روسی صدر ولادیمیر پیوٹن نے نومنتخب امریکی صدر ڈونلڈ ٹرمپ کو صدارتی الیکشن جیتنے پر مبارکباد پیش کردی۔
روسی صدر نے کہا کہ روس امریکہ کے ساتھ تعلقات بحالی کیلئے تیار ہے، بال امریکہ کے کورٹ میں ہے، ٹرمپ کی جانب سے روس سے تعلقات کی بحالی کی خواہش پر توجہ دینی چاہیے۔
صدر پیوٹن کا کہنا تھا کہ انہیں امید ہے امریکہ سمجھ لے گا کہ روس پر پابندیاں لگانے کی ضرورت نہیں اور ہماری سرحدوں پر تنازعات کیلئے اکسانے کا بھی فائدہ نہیں ہوگا۔
گزشتہ روز کریملن سے جاری ایک بیان میں روسی صدر ولادیمیر پیوٹن کی جانب سے امریکہ کے نو منتخب صدر ڈونلڈ ٹرمپ کو مبارکباد کا پیغام بھجوائے جانے سے متعلق کہا گیا تھا کہ ٹرمپ کو جیت پر مبارکباد دینے کے صدر پیوٹن کے کسی بھی منصوبے سے لاعلم ہیں۔
بیان میں کریملن کا کہنا تھا کہ امریکہ روس کیلئے دشمن ریاست ہے جو یوکرین کی جنگ میں براہ راست اور بالواسطہ طور پر ملوث ہے۔
