سیاسیات- ایرانی صدر سید ابراہیم رئیسی نے روسی صدر کے ساتھ اپنی ملاقات کے اہم موضوعات میں سے ایک غزہ پر صیہونی رجیم کے حملوں کو فوری روکنے اور اس پٹی کا محاصرہ ختم کرنے کی ضرورت پر زور دینا قرار دیا۔
سید ابراہیم رئیسی آج صبح روس کے ایک روزہ دورے کے بعد تہران واپس پہنچے جہاں اس دورے کے نتائج کی وضاحت کرتے ہوئے کہا کہ یہ دورہ روس کے صدر اور اعلیٰ عہدے داروں سے ملاقات اور گفت و شنید کا اچھا موقع ثابت ہوا جس میں دونوں ممالک کے باہمی دلچسپی کے امور بالخصوص توانائی، زراعت، ٹرانزٹ اور شمالی جنوبی روٹ کے حوالے سے بات چیت ہوئی۔
صدر رئیسی نے اس دورے میں اپنے روسی ہم منصب کے ساتھ مسئلہ فلسطین کو بھی اہم ایجنڈے کے طور پر شامل کرتے ہوئے اس حوالے سے کہا کہ اس ملاقات میں غزہ کے مظلوم عوام کے خلاف بمباری کو فوری طور پر روکنے کے لیے فوری اقدام، اس علاقے کی ناکہ بندی کو ہٹانے اور فلسطینی قوم کے حقوق کے لئے آواز اٹھانے کو دونوں ملکوں کے مشترکہ ایجنڈے کے طور پر تبادلہ خیال کیا گیا۔
