سیاسیات- امریکہ کی جانب سے ایران پر عائد پابندیوں پر ردعمل دیتے ہوئے ایرانی سپریم لیڈر آیت اللہ سید علی خامنہ ای نے امریکہ کے ساتھ مذاکرات نہ کرنے کا اعلان کردیا۔
امریکی صدر ڈونلڈ ٹرمپ کی جانب سے ایران پر پابندیاں لگانے کے بعد ایرانی سپریم لیڈر آیت اللہ خامنہ ای نے امریکہ کے ساتھ مذاکرات نہ کرنے کا اعلان کرتے ہوئے کہا کہ امریکہ کے ساتھ مذاکرات سمجھداری اور قابل احترام نہیں ہوں گے۔
ایرانی سپریم لیڈر نے کہا کہ مذاکرات سے انکار کی وجہ یہ ہے کہ ہمارا تجربہ ہمیں یہ بتاتا ہے، ایران نے ماضی میں بہت سی رعایتیں دیں مگر امریکہ نے ان معاہدوں کو توڑ دیا، ایسی حکومت کے ساتھ بات چیت نہیں ہونی چاہیے۔
سید علی خامنہ ای کا کہنا تھا کہ اگر امریکہ نے ہماری سلامتی کو خطرے میں ڈالا تو ہم بھی ان کی سلامتی کو خطرے میں ڈالیں گے۔
واضح رہے کہ ڈونلڈ ٹرمپ نے آج ایران پر مختلف پابندیاں عائد کردی ہیں جس میں ایران کے تیل کے نیٹ ورک کو نشانہ بنایا گیا ہے۔
