سیاسیات۔ ایچ بی ایل پاکستان سپر لیگ (پی ایس ایل) 10 کے دوسرے میچ میں کوئٹہ گلیڈی ایٹرز نے پشاور زلمی کو 80 رنز سے ہرا دیا۔
راولپنڈی میں کھیلے گئے میچ میں پشاور زلمی نے ٹاس جیت کر بولنگ کا فیصلہ کیا۔ کوئٹہ گلیڈی ایٹرز نے پہلے بیٹنگ کرتے ہوئے مقررہ 20 اوورز میں 3 وکٹوں کے نقصان پر 216 رنز بنائے۔
کوئٹہ کی جانب سے کپتان سعود شکیل اور فن ایلن نے 88 رنز کی شراکت فراہم کی۔ سعود شکیل نے59 اور فن ایلن نے53 رنزکی اننگز کھیلیں۔
حسن نواز نے 41،کوشال مینڈس نے 35 اور رائیلی روسو نے 21 رنز اسکور کیے۔
پشاور زلمی کی جانب سے علی رضا، سفیان مقیم اور جوزف نے ایک، ایک وکٹ حاصل کی۔
217 رنز کے ہدف کے جواب میں پشاور زلمی کی ٹیم 136 رنز ہی بناسکی۔
زلمی کی جانب سے صائم ایوب 50 رنز کے ساتھ نمایاں رہے، حسین طلعت نے 35، مچل اوون نے 31 رنز بنائے۔
زلمی کی پوری ٹیم سولویں اوور میں 136 رنز پر ڈھیر ہوگئی۔
کوئٹہ کی جانب سے ابرار احمد نے 4، محمد عامر اور عثمان طارق نے 2، دو کھلاڑی آؤٹ کیے۔
ایچ بی ایل پاکستان سُپر لیگ (پی ایس ایل) 10 کے تیسرے میچ میں کراچی کنگز نے ملتان سلطانز کو شکست دے دی۔
کراچی کنگز نے 235 رنز کا ہدف آخری اوور میں 6 وکٹوں کے نقصان پر حاصل کرلیا اور ملتان سلطانز کو 4 وکٹوں سے ہرایا۔
کراچی میں کھیلے گئے میچ میں کراچی کنگز نے ٹاس جیت کر فیلڈنگ کا فیصلہ کیا اور ملتان سلطانز کو بیٹنگ کی دعوت دی۔
ملتان سلطانز کی جانب سے کپتان محمد رضوان اور ہوپ نے اننگز کا آغاز کیا اور پہلی وکٹ پر 55 رنز کی شراکت ہوئی تاہم ہوپ 8 رنز بنا کر آؤٹ ہوئے۔
اس کے بعد عثمان خان بھی 19 رنز بنا کر پویلین لوٹ گئے۔
رضوان اس ایڈیشن کی پہلی سنچری بنانے میں کامیاب رہے، اُنہوں نے 105رنز کی ناقابل شکست اننگز کھیلی۔ محمد رضوان نے 63 گیندوں پر پانچ چھکوں اور 9 چوکوں کی مدد سے یہ اننگز کھیلی۔ کیوی آل راؤنڈر مائیکل بریسویل نے 17 گیندوں پر 44 رنز اسکور کیے، اُن کے علاوہ کامران غلام نے 36 رنز بنائے۔
ملتان سلطانز نے مقررہ20 اوورز میں 3 وکٹوں کے نقصان پر 234رنز بنائے۔ کراچی کنگز کی جانب سے حسن علی، عباس آفریدی اور خوشدل شاہ نے ایک ایک وکٹ حاصل کی۔
ملتان سلطانز کے 235 رنز کے ہدف کے تعاقب میں کراچی کنگز کی ابتدائی 4 وکٹیں 79 رنز پر گرچکی تھیں تاہم جیمز ونس اور خوشدل شاہ نے جارحانہ کھیل پیش کیا۔ پانچویں وکٹ پر 142 رنز کی شراکت قائم ہوئی اور جیمز ونس نے فتح گر سنچری اننگز کھیلی اور 101 رنز بنا کر آؤٹ ہوئے۔
کراچی کنگز نے آخری اوور میں 6 وکٹوں کے نقصان پر 235 رنز کا ہدف حاصل کرلیا اور ملتان سلطانز کو 4 وکٹوں سے شکست دی۔
خوشدل شاہ 60 رنز بناکر نمایاں رہے۔ ملتان سلطانز کی جانب سے عاکف جاوید نے 3 وکٹیں حاصل کیں۔
